ဖာသီ၊ ဍုၚ်
| ဍုၚ်ဖာသီ Pathein | |
|---|---|
| ဍုင် | |
 ဍုင်ဖာသီ | |
  ဍုၚ်ဖာသီ ဒၞာဲဍုင်ဖာသီ မၞုံ | |
| ဒတန်ဒၞး: 16°27′39″N 94°26′02″E / 16.460896°N 94.434026°Eဒတန်: 16°27′39″N 94°26′02″E / 16.460896°N 94.434026°E | |
| ကၟိန်ဍုင် |
 Myanmar |
| ပြည်နယ်၊ တိုင်း | ဧရာဝတီတိုင်းဒေသကြီး |
| ခရိုင် | ပုသိမ်ခရိုင် |
| လၟိဟ်မၞိဟ် | |
| • သီုဖအိုတ် | ၃၀၀ ၀၀၀ |
| • ဂကူဂမၠိုင် | ဗၟာ၊ ဂလာ၊ ကရေင် |
| • ဘာသာ | ဗုဒ္ဓဘာသာ၊ ခရေတ်ယာန်၊ အေတ်သလာမ် |
| ကုဒ် ဨရိယာ | ၀၄၂[၁] |
ဍုင်ဖာသီ (အၚ်္ဂလိက်: Pathein) ဝွံ ဒှ် ဍုင်ဇၞော် ရးဨရာဝတဳတုဲ ပ္ဍဲဍုင်ဂှ် လၟိဟ်မၞိဟ် မပဒတဴ နွံ ၃၀၀၀၀၀ ပြင်ရ၊၊ ဍုင်ဖာသီဂှ် နူဍုင်လ္ဂုင် လပါ်ပလိုတ် ခြာ နွံ ၁၁၈ တိုင်ရ၊၊ ဍုင်ဖာသီဂှ် နွံဇိုင် ၜဳငဝန်တုဲ ဂွံစိုပ်ၜဳဇၞော်ဂှ် နွံ ၇၅ တိုင်ဒှ်ကီုလေဝ် ဟိုတ်နူၜဳငဝန်ဂှ် က္ၜင်ကပေါတ်လုပ်စိုပ်ဒၟံင်တုဲ ဍုင်ဖာသီဂှ် ဒှ်ဍုင်သၞေဟ်ၜဳဇၞော်မွဲရ၊၊ [၂] ဍုင်ဖာသီဂှ် လုပ်လၟိဟ် ပ္ဍဲစရင် ရးမန်ပိတုဲ ပ္ဍဲအခိင်ကၠာတေအ် နွံကဵု ဍုင် (၃၂)ဍုင်ရ၊၊
နိရုတ္တိ
[ပလေဝ်ဒါန် | ပလေဝ်ဒါန် တမ်ကၞက်]ဖာသီ ယၟုဍုင်ဝွံ ဒှ်မအရေဝ်ဝေါဟာရမန်တြေံမွဲရ၊၊ ဖာ ဂှ် ဒှ်တၟေင်မနာမ်ရ၊၊ ဖာဂှ် ပတၟေင်ကု အခိင်အခါ (ကာလ်ဖာရ်) မ္ဂး ဂွံအဓိပ္ပါယ် အခိင်မတုဲကၠုင် ဗွဲမလအ်ရ၊၊ ဖာဂှ် ပတၟေင် ကုအရပ်အရာမွဲမွဲမ္ဂး ဂွံအဓိပ္ပါယ်ဇၞော်ရ၊၊ ပ္ဍဲဒၞာဲဏအ် ဖာဂှ် ပတၟေင် ကုသီ ရ၊၊ သီဝွံ ဗွဲစၟတ် ကၠုင်နူအရေဝ်တြေံ မဂွံအဓိပ္ပါယ် ၜဳရ၊၊ ဟိုတ်ဂှ်ရ ဖာသီ ဂှ် နူတမ်တေအ် ဖာရ်သဳ မဂွံအဓိပ္ပါယ် ၜဳဇၞော်ရ၊၊ ဟိုတ်နူနွံ မကြပ်ကဵု ၜဳဇၞော်တုဲ နကဵုအဓိပ္ပါယ် ဍုင်ၜဳဇၞော် ညးမကော်စတုဲ ဍုင်ဖာသီရ၊၊ ညံင်ရဴဏအ်ကီု ဍုင်ဖာအင် ဂှ် ဂွံအဓိပ္ပါယ် ဍုင်လှာအင်ဇၞော်၊၊ တၞင်သဳ ဂှ် မဂွံအဓိပ္ပါယ် တၞင်ၜဳရ၊၊
ပ္ဍဲလိက်တၟအ် သီကလျာဏဳဗီုပါဠိဂှ် ညးခုတ်လဝ် ဗီုပါဠိ ကုသိမရဋ္ဌ ရ၊၊ လိက်တၟအ်သီကလျာဏဳဂှ် ဒှ်လိက်ခေတ်လဒေါဝ်တုဲ မန်ခေတ်လဒေါဝ်တအ် ဟွံတီကေတ် အဓိပ္ပါယ်တမ် မထေင်ကေတ် ဍုင်ဂှ် မကၠုင်နူယၟု သိမ် တုဲ မဗဒှ်လဝ် ဗီုဂှ် ဒှ်မာန်ရ၊၊
ပ္ဍဲလိက်စၟတ်သမ္တီ ကောန်ယူရောပ်တအ်ဂှ် ဍုင်ဖာသီဝွံ ညးတအ် ကော်စ Cosmin (ကအ်သၟိင်) ရဴသာ်ဝွံ ဂွံဆဵုကေတ်တုဲ ခေတ်လက္ကရဴညိဂှ် ညးတအ်ချူ Bassein မဒုင်သဇိုင် ကုရမ္သာင်မန်တုဲ ညးတအ်ကော်ကၠုင်ရ၊၊
ဒတန်
[ပလေဝ်ဒါန် | ပလေဝ်ဒါန် တမ်ကၞက်]ဍုင်ဖာသီဂှ် သမၠဲ ၁၂ စတုရံတိုင်တုဲ လေတ္တဳကျူသၟဝ်ကျာ နွံ ၁၆ ဒဳဂရဳ ကဵု ၄၆ မိနေတ်၊ လံင်ဂျဳကျူဗၟံက် နွံ ၉၄ ဒဳဂရဳ ကဵု ၄၃ မိနေတ်ရ၊၊ ဍုင်ဖာသီဂှ် နွံသြင်ကြုင်ဖာသီ ၜါလပါ် သြင်ဗၟံက် ကဵု သြင်ပလိုတ်တုဲ ဒှ်ဍုင် ရုင်အလဵုအသဳမၞုံရ၊၊
အရာပ် ယၟုမြဟ် ပ္ဍဲဍုင်ဖာသီဂှ် အရာပ် အသည်ဂျီ၊ ကြုင်တလာင်၊ ကုန်သေမ်၊ ကုန်မြာင်၊ အရာပ်အတဳတအ်တုဲ ဂၠံင်ဇၞော်ဂှ် နွံမွဲဒမြိပ် ကုသၞေဟ်ၜဳရ၊၊
ဝင်အတိက်
[ပလေဝ်ဒါန် | ပလေဝ်ဒါန် တမ်ကၞက်]ဍုင်ဖာသီဝွံ ဒှ်ဍုင်တြေံမွဲတုဲ အတိုင်စၟတ်သမ္တီမ္ဂး ပ္ဍဲခေတ်သၟိင်အသောက ပ္ဍဲသက္ကရာဇ်သာသနာ ၂၁၈ ဂှ် ညးကော်စ အတိသဉ္စာနဂရ ရ၊၊ ဍုင်ဖာသီဝွံ မဒှ်ဍုင်သၞေဟ်ၜဳ မဆက်စၠောအ်ကဵု အန္ဒိယမွဲတုဲ ကောန်ရးယူရောပ်တအ် နွံကၠုင်ပၟိက် ဗွဲမဇၞော်ကဵုဒြဟတ်တုဲ ပၠံင်ဒၟံင်ရေင်သကအ် အိုတ်ရ၊၊ နူကဵုဖာသီမွဲကဆံင် ကပေါတ်ညးတအ် ပလံင်ဗစိုပ် ဍုင်ကြုက်လေဝ်ဂွံ၊ ကပေါတ်နူဍုင်ကြုက်လေဝ် ကလိဂွံ ပ္ဍဲဍုင်ဖာသီမာန်ရ၊၊ ပ္ဍဲသၞာံခရေတ် ၁၆၈၇ ဂှ် အင်္ဂလိက် ဖျေဟ်ဗဒပ်ဇကု ပ္ဍဲ ဟိုင်းကြီးကျွန်း တုဲ စွံလဝ် ဒၞာဲရုင်ကမ္မဏဳ ပ္ဍဲဍုင်ဖာသီကီုရ၊၊ ပ္ဍဲအခိင်ပၞာန်အံင်ဇေယျ ကၠုင်ဗတိုက် ကုမန်ဂှ် အင်္ဂလိက် ကေတ်တင်တုပ်စိုတ် ကုအံင်ဇေယျ၊ အင်္ဂလိက် ဗိုင်ထံက်ပင် လွဟ်ကီု သီုကဵုမၞိဟ် ကုအံင်ဇေယျ သွက်ဂွံဗတိုက်ကဵုမန်ရ၊၊ ကာလအံင်ဇေယျ ကလိဂွံဇမၞးမန်တုဲ အတိုင်မတုပ်လဝ်စိုတ်ဂှ် အံင်ဇေယျ ဒးကဵုတိဒၞာဲ ကုအင်္ဂလိက် ပ္ဍဲဍုင်ဖာသီမွဲဒၞာဲ၊ ပ္ဍဲဍုင်လ္ဂုင်မွဲဒၞာဲရ၊၊ ဍုင်သၞေဟ်တြေံ ဍုင်သြေင်ဂှ် ညးပလီုထုဲ စၞးဂှ် ညးစွံ ပ္ဍဲဍုင်လ္ဂုင်ရ၊၊ အင်္ဂလိက် ကလိဂွံဒၞာဲဗဒိုပ် ပ္ဍဲဍုင်ဖာသီ ကေုာံ ဍုင်လ္ဂုင်တုဲ ဗွဲကြဴ ကလေင်ဗတိုက်ကဵုဗၟာတုဲ သီကေတ်ထောအ်အလုံမွဲဍုင်ရ၊၊
ဂကူ ကေုာံ ဘာသာ
[ပလေဝ်ဒါန် | ပလေဝ်ဒါန် တမ်ကၞက်]ပ္ဍဲဍုင်ဖာသီဂှ် ၜိုန်ရကေင်ဒှ်လဝ် ဍုင်ဇၞော်မန် မၞုံကဵု (၃၂) ဍုင်ကီုလေဝ် ပ္ဍဲအခိင်လၟုဟ် ဂကူမန်မပဒတဴ ပ္ဍဲဍုင်ဖာသီဂှ် အောန်ကွေဟ်ဟ် စဵုကဵု ကြပ်ဟွံမဲရ၊၊ မၞိဟ်မဟီုအရေဝ်ဗၟာ ဂကူယခေင်၊ ဂကူကရေင်တအ် နွံဂၠိုင်တုဲ ဂကူကြုက် ကဵု ဂကူဂလာတအ်နွံစ ညိညကီုရ၊၊ မၞိဟ်ဗွဲမဂၠိုင်ဂှ် ဒှ်မၞိဟ် မရှ်ေသှ်ေဗုဒ္ဓဘာသာတုဲ ဂကူကရေင်တအ်ဂှ် ဒှ်မၞိဟ်မလျုင်ပတှ်ေ ဘာသာခရေတ်ကာတ်တလေတ် ကဵု ဂကောံသင်ဗလိုက်ဂၠိုင်ရ၊၊ ဘာသာဟိန္ဒူ ကဵု မူသလေန်လေဝ် နွံညိညကီုရ၊၊
ယၟုဍုင် ရးဖာသီ ၃၂ ဍုင် ပယျဵုရးဖာသီဂှ် လပါ်ဗၟံက်မ္ဂး စိုပ် ဇရွံ၊ တောင်စွန် အာလိန်၊ လပါ်ပလိုတ် စိုပ်ကွာန်မိုးတိမ်ပြင်၊ သၟဝ်ကျာ စိုပ် ကြန်ကင်းပရှင့်ချောင်း ဟီုလဝ်ရ၊၊
| ယၟုခေတ်တြေံ | ယၟု ခေတ်လၟုဟ် |
|---|---|
| ကျိုက်စတည် | ဟိုင်းကြီး |
| ကျိုက်သရဲ | မော်တင်၊ |
| ကျိုက်ခရံ | ဘုရားလှကျုံကူး |
| ကျိုက်ထူပါရုံကမ်းဖြူ | မြစ်တရာ |
| ကျိုက်ဇလတမော် | သမံဒေဝကျောက်သင်္ဘော |
| ကျိုက်ပဒေါ | ပန်းမမြစ်တာ-ပန်းမဝတီ |
| ကျိုက်အမွန် | ဆိပ်ကြီး |
| ကျိုက်ဝှန် | ကျုံးတုံး ကံကြီး |
| ကျိုက်ဇလဲထော် | မြောင်းမြမြို့ဟောင်းရာ |
| ဆိပ်ကြီး | မြောင်းမြ |
| ကျိုက်မိ | သစ်ရောင်းချောင်း |
| ကျိုက်ဓော | တကောင်း |
| ကျိုက်ပိကျုံတရော် | ကျုံပျော် |
| ကျိုက်မော်ဓော်ထလျော် | ထောင်လုံ |
| ကျိုက်သထော | ရေကြည်ပန်းတော |
| ကျိုက်ပတည် | သာရဝေါမြို့ မြို့ကွင်း (ဟင်္သာတ) |
| ဘုရားကြီးသံသေတံခွန်မြို့ | ဒံဘီ |
| ကျိုက်တုံလုံထော ကျန်ကင်းပရှင့်ချောင်း တရုပ်မော်မြို့ထိ |
မြန်အောင် |
| ကျိုက်ပြိုတောင် | ကျိုက်ထော် (အင်္ဂပူ-အုတ်ဖို( |
| ကျိုက်ငူသုနန္ဒ | မန်းတြာ |
| ကျိုက်တောင်တော် | ပန်းတောကြီး (၄ မျက်နှာ) |
| ကျိုက်မင်းပတော | ကျောက်ချောင်းကလေး (သီဒါ) |
| ကျိုက်အဝှန်ကျုံးတုံး | ဘိုးတော်ဘုရားကြီး |
| ကျိုက်ခရံဂဟေနံ | ခေနံ |
| ကျိုက်သတော | ခသောဒရှာ (ဘုရားကုန်း) |
| ကျိုက်ခတော်တုံ | ထန်းဘူး |
| ကျိုခရံထော် ကျိုက်ဖြူ |
သိမ်ချောင်း (သာပေါင်း ကညင်ချောင်း) |
| ကျိုက်နံကလံတနပဝေါရိ ကျိုက်တံတလံတဝေါ |
ကျောက်ချောင်းကြီး |
| ကျိုက်တည်မုဋ္ဌော သမြင်တုံး |
ပန်းတနော် |
| ကျိုက်သလွန်မွန် | ဓနုဖြူမြို့ |
| ကျိုက်အနန္ဒပူရ | ညောင်ပင်ရွာ-ဇရွံတို့ |
အတိုင်စရင် နူသၞာံ ၁၁၄၅ သၟိင်ဗၟာ သာလွန်မင်း
နိဿဲ
[ပလေဝ်ဒါန် | ပလေဝ်ဒါန် တမ်ကၞက်]- ↑ http://www.myanmars.net/myanmar/telephone-area-codes.htm
- ↑ မြန်မာ့စွယ်စုံကျမ်း၊ အတွဲ(၆)၊ စာ ၃၄၉-၅၂။